Халықаралық студенттер күніне орай, Бас имам Алтынбек Ұтысханұлы жастармен жүздесті
- Бөлім: Жаңалықтар
islam-atyrau.kz/15 қараша, 2019 жыл. Бүгін Атырау облысының Бас имамы Алтынбек Ұтысханұлы орталық "Иманғали" мешітінде жастар жамағатымен жүздесті.
Халықаралық студенттер күніне орай өткен шарада дінге қызығушылық танытып жүрген жастар және жамағат қатысты.
Құптан намазынан кейін өткен іс шара аясында ұстаз Алтынбек Ұтысханұлы "Асыр" сүресінің тәпсіріне кеңінен тоқталды.
"Өмір күрестен тұрады. Адам баласының өмір бойы күресіп өтуі тиіс дұшпаны - оның нәпсісі. Ең алдымен, адам жанын тәрбиелеп алуы керек. Ал, жанды тәрбиелеп, нәпсіні тежеуге септігін тигізер сүре - "Асыр" сүресі. Алла Тағала бұл сүрені уақытпен ант етіп бастаған. Алланың бір нәрсемен ант беруі - сол нәрсенің ұлылығын, маңыздылығын білдіреді" деп атап өткен ұстаз, одан әрі уақыт, иман және амал мәселесіне тоқталды.
Еркін форматта өткен кездесу соңында "Иман жастары" ұйымына еріктілер жаңа мүшелікке қабылданды.
Орталық "Иманғали" мешітінің баспасөз-қызметі.